Haree Oras no Minutu Hanesan:
Sentidu saida lós mak subar iha ne’eba? Entre Mitus no experiénsia
Ema
ruma susar atu hetan oras no relójiu digital (iha telefone ka iha relójiu
dijitál – relójiu ida ne’ebé la hó punteiru) ne’ebé hatudu oras no minutu
hanesan, ezemplu 07:07; 00:00; no seluk seluk tan. Ne’e susar hetan duni, la
kónta intensaun husi ema ida nian para hein haree. Ida ne’e konta deit ba
situasaun sira ne’ebé mak ita foti ka hit relójiu dijitál no iha biban ne’e
kedan ita hetan oras no minutu hanesan. Ou karik ita la toma atensaun ba atu
haree no konsidera ida ne’e ou ka ita haree mas ita laiha koriozidade atu
hatene tanba sa mak mosu nune’e. Se hetan dala ida deit iha loron ida ou fulan
ida ou iha tinan ida, ne’e la problema. Tanba sa? Tanba dala ruma ita la toma konsiderasaun la toma em konta
kona-ba akontesimentu kiik ne’e. Maibé saida mak akontese wainhira ita hetan
bebeik, ezemplu dader hetan tiha, meiu dia hetan no kalan bele hetan tan ou
aban hetan, bainrua mós hetan, no hetan bebeik deit. Iha ne’e ita presiza husu
no fó interogasaun ida, katak; buat ne’e akontese pur konsidénsia deit ka? Se
pur konsidénsia deit, bele akontese dala barak pur konsidénsia ka iha lian
indonézia dehan secara kebetulan deit, iha ita nia esperiénsia moris ka lae.
Doutrina husi
fatalista sira dehan katak laiha akontesimentu ida mak repete de tal maneira ou
repete tal ikual ho akontesimentu ne’ebé mosu uluk ona. Tanba ne’e laiha
repetisaun ba akontesimentu ruma. Akresenta tan katak buat ne’ebé mak atu
akontese, akontese ka akontese tiha ona ne’e laós pur konsidénsia ka secara
kebetulan. Naturalmente iha ona ordén ida ka iha lian indonésia dehan katak sudah
di gariskan untuk terjadi. Já é natural para contecer. No, karik, bele
akontese tanba obra demiurgo platóniku nian. Será? Tanba obra ka servisu
demiurgu nian atu hadian buat ruma?
Ideia ida katak kualkér akontesimentu diak ka aat, sempre iha sentidu positivu
katak atu aperfeisoa ka hadian diak liu tan buat ruma.
Ora iha kontextu kazu ne’ebé há’u hatúr iha ne’e,
será que akontesimentu relójiu dijitál ne’e la mosu pur konsidénsia? Há’u
hanoin, se ita hare akontesimentu ne’e dala ida deit, ne’e ita bele dehan pur
konsidénsia entre reloju ne’e marka oras no minutu hanesan no biban ne’e kedan
mak ha’u hare. Maibé oinsa ho há’u haree se bebeik? Loron ida bele dala rua,
semana no fulan ida bele dala 4 ka liu tan ne’e. Iha ne’e, karik, la pur
konsidénsia ona, muitu menus pur neksu de kausalidade ka indonésia dehan hubungan
sebab akibat. Iha kazu ida ne’e, ita, karik diak liu, ita toka liu
kona-ba experéinsia ruma. Tanba tuir empirista David Hume dehan katak
esperíensia mak fó informasaun direta no serta ba objetu ida ne’ebé mak ita
fokus ka observa hela iha biban no tempu ida. Mezmuke dala ruma ita deskreve
fali informasaun ne’ebé tama mai ita nia ratio ho linguajen ne’ebé la perfeitu
no la kompletu, maibé, iha kontextu ida ne’e, ita buka atu oinsa deskreve kazu
ida ne’e liu husi esperiénsia no linguajén nebe’e limitadu.
Iha mitologia
barak ne’ebé fó esplikasaun kona-ba kazu ne’ebé hatúr iha ne’e. Balun dehan
katak se ita hetan oras no minutu haanesan iha lós númeru X ka Y ne’e hatudu
katak ema ruma (namoradu/a) tau laran hela ba ita ka nia sente saudades lós ho
ita. Iha balun dehan tan katak se ita hetan oras no minutu a) mak signifika
katak ita ema fiar nain ne’ebé reza la loloos ka iha lian indonésia dehan lalai
ka iha portugues dehan falha.
Maibé ba há’u,
experíensia pessoal fó hatene mai há’u katak wainhira há’u hetan bebeik oras no
minutu ne’ebé hanesan, probabilidade, katak há’u iha sorte ne’ebé diak ba há’u
nia vida. Liu-liu iha zona ka área ne’ebé há’u luta hela. Katak, atu hetan
rezultadu diak ida, rezultadu satisfatóriu ida ba há’u, grasa husi há’u nia
esforsu ka servisu makas hamutuk ho orasaun (ba Maromak, ba natureza no ba uma
lulik no matebian). Sim, sertu katak orasaun ne’e só ba Nai Maromak. Maibé
orasaun, tuir há’u hanoin, katak bele konfigura iha pedidu de apoiu ne’ebé ita
dirije ba natureza, matebian no uma lulik. Tanba sa? Tanba tuir há’u nia hanoin,
estrutura orgánika ne’ebé iha kada estadu, iha kada goveru ka kada instituisaun
ne’e reflexu ida mai husi estrutura ne’ebé iha ona forsa natural iha ona. Ho
nune’e, ser supernatural (para além de Demiurgu) ne’ebé ema fiar nain sira bolu
nudar Maromak ka Deus, ne’ebé mak kaer ukun no bandu supremu ka bot no beran
wain ne’e, nia iha estrutura polivalensia no multifunsi. Estrutura ida ne’ebé
mak korelasionada no no NIA mak komanda no fó ordem no nia estrutura subalternu
sira sai hanesan estaf ka ukun kiik iha reinu ka zona ida-idak no ho nune’e
sira ne’e mak hatoo informasaun ba leten konaba buat hotu ne’ebé akontese iha
zona nia domíniu. Ho razaun ida ne’e mak hau hanoin katak halo orasaun hanesan
pedidu apoiu ba ukun kik sira ne’e, atu sira hatutan ka lori ba leten. Tanba
sa? Tanba wainhira ita hatoo direitamente ba leten, iha Leten ne’ebá rona,
maibé atu diak liu tan mak report ka informasaun husi kiik sae
ba tan ne’e haforsa liu tan ita nia pedidu. No husi ne’e ita bele hetan auxíliu
ka tulun lalais. Fiar ka lae, ne’e há’u nia hanoin no há’u nia esperéinsia
pessoal.
Hetan oras no
minutu hanesan fó sentidu positivu ida katak rezultadu diak besik ona ka too
ona ba hau nia moris, liu husi, luta ka esforsu ka servisu makas ne’ebé há’u
halo. Iha tinan 2013 nia laran, maizumenus, hahú husi fulan Setembru, hau hetan
bebeik há’u nia oras dijital iha telefone marka oras no minutu hanesan no, ida
ne’e la’os pur konsidénsia nem pur neksu de kausalidade. Loron ida bele hetan
dala rua ka tolu, semana ida bele dala hat ka lima. No fulan ida hau hetan
barak. Rezultadu ne’ebé há’u konfirma mak ne’e, hau stress tanba luta ba
estuda, tauk la liu kadeiras ka matakuliah, tauk lakon bolsa de
estudu ne’ebé hau iha, entaun, hau estduda makas tan, ikus mai hau bele konsege
termina há’u nia lisensiatura ka lulus s1 ho peiodu tempu ne’ebé badak no ema
la konsegue imajina katak há’u bele hetan ssesu ho kondisaun ida ne’e.
Será ke iha ne’e
pur konsidénsia entre relozu no rezultadu eskola?
Hatán ba lia husu ida ne’e, há’u hanoin resposa
negativa. Tanba sa? Tanba, primeiru – hau nunka hetan sinál ida ne’e
antes. Será ke há’u mak la konsiénte ka la toma konsiderasaun iha tempu
anterior ba kazu ida ne’e? Há’u hanoin, La’e. Ne’e primeira vez mak hau hetan,
hau desde tinan lima uza ona relozu dijital. Mai iha SMP mós há’u utliza reloju
dijitál to remata SMP (eskola pré-sekundária). Iha SMA há’u la utiliza reloju
dijital ona. Mai iha eskola ensinu superior fatin 3 ne’ebé há’u tama, há’u
utliza na telemovel, no há’u nunka hetan akontesimentu oras no minutu hanesan.
Entaun, será que uluk ne’e há’u la luta makas? Lae, uluk mós hau luta makas
para hetan valor ne’ebé diak na satisfaz tebes há’u, maibé ida fali iha 2013 sa’e
mai ne’e, hau iha situasaun ida ketak. Ketak tanba situasaun desfavorável no
vida akadémika hetan presaun makas liu duké normál.
Fofoun há’u
hetan ida ne’e, há’u husu tun sa’e ba belun sira, tanba sa? No sira sempre hatán
mai hau ho resposta ne’ebé hau hatúr iha leten kona-ba aluzaun ba X, Y no a) ne’e.
Maibé ikus mai, ho ha’u nia hanoin, liu husi esperíensia ba tinan 2014 no 2015
nian, ha’u hetan rezultadu diak barak iha há’u nia vida. Tanba ne’e, tuir há’u
hanoin katak wainhira ita hetan bebeik oras no minutu hanesan ne’e signifika
katak ita sei hetan susesu ba ita nia moris no hetan rezutadu diak ba ita nia
esforsu no servisu makas sira. Karik ema barak hetan susesu maibé sinál seluk mak
sira hetan molok konsege kaer to rezultadu ka molok deskobre rezultadu ne’e.
Bele mosu sinal seluk ba sira no bele deskobre bele mós la deskobre, aliás,
ignora direita ou indireitamente. Ba há’u, moris ne’e presiza akompanha
evolusaun ka revolusaun hotu ne’ebé mak liu iha koredór moris nian ne’e, hodi
nune’e ita bele aprende buat ruma. Aprende la’os husi eskola deit, uma deit, no
liu husi livru deit, maibé liu husi meiuz oioin, liu husi esperiénsia pesoal no
experiénsia ema seluk nian ka liu mós husi akontesimentu natural sira seluk. Há’u
asosia akontesimentu reloju nian ho rezultadu ne’ebé há’u hetan tanba ne’e
momentu ne’ebé há’u too rezutadu últimu husi há’u nia exforsu. Leitor sira bele
hanoin seluk, maibé ne’e mak esperíensia pessoal ida ne’ebé há’u asosia ho
akontesimentu ida ne’ebé, tuir há’u hanoin, fó sinal ida ba há’u atu há’u halo
reflesaun no rezulta katak, afinál sinal ida ne’e hatudu ba há’u buat ida ne’e.
Konkluzaun: Bazeia
ba esperiénsia, wainhira ita hetan bebeik oras no minutu hanesan (08:08; 13:13
no seluk tan) iha ita nia reloju dijitál, ne’e sinál katak la kleur tan ita sei
hetan rezutadu diak no satisfatóriu husi ita nia servisu no esforsu ne’ebé ita
halo ona. Tanba sa? Tanba oras mak instrumentu ida ne’ebé ema baibain utiliza
hodi sukat tempu atu hah’u atividade ruma no atu termina. Tanba ne’e wainhira
hetan oras no minut hanesan, tuir hau nia hanoin bazeia ba há’u nia
esperiénsia, sinál katak tempu o nia terus ne’e liu ona no alegria ka ksolok too
mai hakuak o. Maibé iha kazu interpretasaun seluk, bele mós hatudu katak o nia
ksolok, provisoriamente, termina ka hotu ona no o nia terus (husi forma saida
deit) to mai ona. Ida ne’e depende ba leitura ne’ebé ita halo ba ita nia
esperiénsia rasik no interpreta ba situasaun ka akontesimentu ida seluk.
Liafuan ikus, esperiénsia ita nia moris pasadu mak sai mestre bot ba ita nia
moris ohin no aban; esperiénsia moris ema seluk nian no akontesimentu esteriór
seluk iha koredor moris nian mak sai nudar lalenok no mós lámpada ida ba ita
nia moris ohin no aban.
Sem comentários:
Enviar um comentário
Muito obrigado