Hanoin ruma kona-ba impostos no taxas iha Timor-Lorosa'e (Tétum - língua oficial)

Paulo Soares Martins

(Mestre em Direito Tributário

pela Universidade do Minho, Braga - Portugal).

Impostos no taxas mak tributos ne’ebé Estado estabelese para bele hetan reseitas atu nune’e bele finansia atividade estadu nian ba interesse públiku (Vide artigo 144.º KRDTL). No sidadaun hotu iha dever atu selu impostos no taxas atu nune’e bele kontribui ba reseitas estatal (art.55.º KRDTL). Tanba se ita la selu impostu no taxa, Estadu atu hetan osan iha ne'ebé para halo estrada, ponte, selu polísia no FDTL, hari eskola no hospitál. Eh halo manutensaun ba sasan sira ne'e. Labele laran metin los ba reseita petrolífera tanba ida ne'e la estável eh irenovável eh loron ruma sei maran. Tanba ne'e Estadu maka ita hotu (sidadaun) no sidadaun hotu maka forma Estadu. Estadu existe tanba ita hotu no ita hotu existe tanba Estadu. 

Ko’alia kona-ba taxas no impostos, ita refere ba figura tributos rua ne’ebé nia natureza la hanesan. Maske sira nain rua hola parte iha direito tributário ne’ebé sai hanesan ramu ida husi direitu finanseiru. Direito finanseiru ne’e akumula iha ramu bot ida ne’ebé hanaran direitu ekonómiku. Signifika katak direitu tributáriu maka ramu kik ida ne’ebé mai husi direitu ekonómiku.

Nain rua ketak-ketak maibé ida deit. Ida deit iha ramu direitu finanseiru no ida deit iha naran ida "tributos". Ida deit tanba rua ne'e kontribui hotu ba reseitas estatal nebe'e sei utiliza ba finansiamentu interese públiku sira. Ketak-ketak iha ninia natureza. 

Nune’e impostos mak prestasaun ho kararáter pekuniária ne’ebé sidadaun ida entrega ba Estadu ho nia karatér la-sinaglámatiku, unilateral no koativu. Signifika katak sidadaun ida wainhira selu impostos la simu fali buat ruma hanesan kontra-prestasaun direita. No wainhira la kumpri, Estado reserva direitu atu exije kumprimentu pagamentu imposto nian ba sidadaun ne’ebé mak la selu. Exemplu, selu imposto konabá saláriu.  

Taxas iha nia karáter bilateral no sinaglamátika. Significa katak nia hanesan prestasaun ho natureza pekuniária, bilateral no sinaglamtátika. Katak sidadaun ida wainhira selu taxa ruma tanba nia hetan kontrapresatsaun ida ne’ebé ekivale ba kustu nebé nia selu. Exemplu, selu propinas universidade nian tanba hetan formasaun iha Universidade, selu eletrisidade tanba hetan benefísiu direitu husi ahi eletrisidade iha uma.

Lei iha artigo 144.º númeru 2, KRDTL dehan katak impostos ho taxas kria husi lei. Liafuan "lei" iha ne’e ho sentidu material. Katak bele lei husi Parlamentu Nasionál no bele mós lei husi Governo hanesan Dekretu Lei.

Iha matéria imposto nian, artigo 144.º, n.º 2 ne refere ba lei formal. Significa katak tenki lei husi Parlamentu Nasionál tanba artigo 95.º, n.º 1, alínea p) ne’ebé refere kona-ba “polítika fiskál” refere esklusivamente ba matéria impostos no laos ba taxas. Tan ne’e, matéria impostos ne’e kompeténsia esklusiva Parlamentu Nasionál nian.

Iha matéria taxas, tributo ida ne’e bele kria husi Governu liu husi Dekretu-Lei. Maibé tenki bazeia ba Rejime Jerál Taxas nian. No regime jerál taxas nian ne’e matéria ne’ebé enkuadra iha kompeténsia esklusiva Parlamentu Nasionál nian. Se Governu kria taxa ruma ne’ebé mak la observa ba regime jerál taxas, ita bele dehan katak taxa refere inkonstitusionál. Iha impostos mos, se Governo kria imposto ruma, ita bele dehan katak imposto refere inkonstitusionál tanba laos Governu nia kompeténsia.

Matéria imposto tenki kria husi lei Parlamentu Nasionál nian ne’ebé regula mos ninia matéria esensiál sira hanesan insidénsia (subjetiva no objetiva), taxas, garantias ba kontribuintes sira no benefísiu fiskál. No lei parlamentar ne’e tenki kompletu, klaru no komprensível. Labele husik dalan ba Governu atu apresia konforme nia hakarak. Iha linguajén téknika jurídika fiskál nian karik dehan reserva absoluta lei formal ne’ebé konkretiza iha prinsípiu tipicidade fechada. Tanba wainhira husik Governu halo apresiasaun tuir nia hakarak maka bele lori risku ba ema sira ne’ebé selu impostu. Tanba ema ne'ebé halo apresiasaun tanba iha konseitu indeterminado no iha diskrisionáriu, nia bele apresia tuir nia koñesimentu. Ikus mai, faktu ne'ebé tuir lolos la merese selu imposto mos bele selu hotu. No ida ne'e prejudika direitu ba propriedade ema idaidak nian. Tan ne'e, diak liu mak lei parlamentar ne fixa kedas se se mak atu selu imposto no imposto konabá saída. Iha imposto “konaba saida” iha ne’e tenki fiksa kedas kritérius kompletus ne’ebé determina katak faktu X sujeita ba imposto Y tanba preense kritérius a, b, c no d nebé maka lei rasik haruka (Vide Manual Direito Fiscal Professor Alberto Xavier pp. 110 e seguintes).  

Mak ne'e deit, depois sei kontinua.