Introdusaun
Iha
Administrasaun Públika nian dala barak mak, ho ezijénsia interesse públiku,
servidor Estadu ida tenki dezloka ba nasaun seluk atu hala’o servisu iha
ne’eba. Deslokasaun ne’e bele tanba vizita ofisial ne’ebé mak hetan konvite
husi nasaun destinu, bele vizita tanba interesse atu estabelese koperasaun no
mos motivu seluk.
Iha
biban ida ne’e ita koalia liu kona-ba viajen ba rai-liur ne’ebé mak la’os ho
objetivu atu halo estudu, estudu komparativu ruma no ba finalidade formasaun
nian.
Iha
deslokasaun ba estranjeiru iha vizita ofisiál, servidor Estadu ida presiza
hetan fasilitasaun husi Estadu rasik. Além de facilidades seluk, Estadu liu
husi Decreto-Lei n.º 9/2015, de 22 de abril kona-ba Ajudas de custo por
deslocação em serviço ao Estrangeiro atribui montante monetáriu balun ba
servidor Estadu ne’ebé halo viajen ba rai liur durante nia viajen, nia estadia
iha rai-liur to fila fali mai nia lokal servisu normal.
Ajudas
de custo ida ne’e iha lian seluk dehan per diem - Lia fuan ne’e mai husi
Latin ne’ebé traduz ba portugés katak durante o dia ka iha dalen
Tetun dehan durante loron ida. Iha dalen inglés dehan“by the day” ka daily allowance. Per diem
katak ajudas de custo ka atribuisaun montante orsamentu ruma ne’ebé mak kalkula
ba kada loron durante ema ida nia estadia iha rai-seluk ka iha rai-liur ba
viajén servisu Estadu nian no utiliza hodi responde ba despezas sira ba
alojamentu nian, alimentasaun, transporte, telefone, lavandaria no gastu sira
seluk ne’ebé mak liga ho servidor refere nia estadia iha rai-liur ba servisu
Estadu nian[1].
Ho
nune’e, iha biban ida ne’e ita atu analiza hamutuk hodi hatene limites loron
atribuisaun per diem nian tuir ponto de vista jurídiku. Maibé
molok to iha matéria refere ita presiza hatene uluk enkuadramentu jurídiku, benefisiáriu
per diem, forma kalkulasaun para atribuisaun per diem ba
kada loron no, ikus, limites loron ba per diem ka ajudas de custo
refere.
a)
Enkuadramentu jurídiku
Repúblika Demokrátika
Timor Leste nudar hatur ona iha artigo 1.º no 2.º husi Konstituisaun Repúblika
mak Estadu Direitu. Konseitu Estadu Direitu iha kontextu jestaun finansas
públicas nian signfika lei mak regula jestaun finansas públicas nian hahú husi
preparasaun Orsamentu Jerál Estadu (OJE), aprovasaun no ezekusaun OJE rasik. Ho
nune’e, atualmente iha ordenamento jurídiku finanseiru timor nian disponível
ona lei finanseiru lubun ida. Husi lei sira ne’e, ida ne’ebé mak relevante ba
matéria ne’ebé ita análiza dadaun mak Lei n.º 2/2022, de 10 de fevereiro,
kona-ba Enquadramento do Orçamento Geral do Estado e da Gestão Financeira Pública
(LEOGE) altera ba dala uluk husi Lei n.º 17/2023, de 29 de agosto. Lei
Enkuadramentu ne’ebé temi mak substitui anterior Lei n.º 13/2009, de 21 de
outubro, independetemente nia alterasaun sira.
LEOGE determina iha
artigo 80.º, n.º 1 katak nunka bele realiza despeza ne’ebé mak ilegal ne’ebé
mak la bazeia-ba lei, intrumentu direitu internacional[2], kontratu ka desizaun
judisiál[3]. Dispozisaun ida ne’e
konsagra prinsípiu legalidade iha jestaun finansas públicas, espesifikamente
iha faze ezekusaun ka realizasaun despeza ne’ebé mak utiliza OJE rasik.
Prinsípiu ida ne’e mos hatur iha Decreto-Lei ezekusaun OJE tinan 2024 ne’ebé
mak aprova husi Decreto-Lei n.º 5/2024, de 18 de janeiro, iha nia artigo 25.º[4].
Iha despeza relasiona ho per
diem, Decreto-Lei n.º 5/2024, de 18 de janeiro determina iha artigo
40.º, número 1 katak ajudas de custo ka per diem delokasaun servisu ba rai-liur
implementa tuir Decreto-Lei n.º 9/2015, de 22 de abril, kona-ba Ajudas de Custo
por Deslocações em Serviço ao Estrangeiro (ACUDSE). Diploma legal ida ne’e
kontinua ho intesaun idéntika ne’ebé mak determina tiha ona anteriormente iha
Decreto-Lei n.º 23/2008, de 21 de julho. ACUDSE ne’e mos iha parte ida sai
nudar lei ne’ebé mak materializa ordén legal ne’ebé mak estipula tiha ona iha artigo
68.º no 69.º husi Lei n.º 8/2004, de 15 de julho[5], ne’ebé mak aprova
Estatutu Funsaun Públika no iha parte seluk konkretiza mos dispostu legal iha
número 1 no 4 alínea e) husi artigo 10.º iha Lei n.º 7/2007, de 25 de julho,
kona-ba Estatuto dos Titulares dos Órgãos de Soberania.
b)
Benefisiáriu per diem
Ita hatene ona iha
enkuadramentu jurídiku nian katak diploma legal kona-ba per diem
ka Ajudas de Custo por Deslocações em Serviço ao Estrangeiro nudar Decreto-Lei
ne’ebé mak konkretiza orden legal ne’ebé mak prevé tiha ona iha Lei Estatutu
Funsaun Públika nian nomos Lei Estatuto dos Titulares dos Órgãos de Soberania.
Signifika per diem nudar direitu ida ne’ebé lei mai atribui ka
direitu ex legis be servidor Estadu ida.
Tuir artigu 1.º, númeru 1
husi ACUDSE determina katak
“[O] presente diploma
regula a atribuição de ajudas de custo por deslocações em serviço público ao
estrangeiro e no estrangeiro, devido aos titulares e membros dos órgãos de
soberania, funcionários públicos, agentes administrativos e contratados
equiparados, quando em serviço oficial.”
Iha tradusaun livre ba
dalen Tétum hanesan tuir mai: Diploma ida ne’e regula atribuisaun per diem
iha dezlokasaun servisu públiku nian ba estranjeiru no iha estranjeiru ba
titulares orgaun soberania, funsionáriu públiku, ajente administrativu no
kontratadu ekiparadu sira, bainhira iha servisu ofisial. Portanto, bazeia-ba
disposto ne’ebé ita sita dadaun bele dehan katak atribuisaun per diem
tuir intensaun ACUDSE nian presupoin prensimentu kritériu sira hanesan tuir
mai:
i.
Dezlokasaun ba estranjeiru ka ba rai-liur,
aliás sai husi território nasionál.
ii.
Dezlokasaun tenki “em serviço oficial.
iii.
Dezlokasaun tenki realiza husi servidor
Estadu sira ne’ebé mak lei identifika taxativamente.
Atu
verifika katak dezlokasaun ba rai-liur ne’e oficial maka tenki iha dokumentu
komprovativu, por exemplo, despaxu orden de servisu husi entidade kompetente ou
husi membru Governu kompetente. Despaixu orden servisu tenki identifika naran
servidor Estadu nian, agenda servisu iha rai-liur no dokumentu seluk tan ne’ebé
mak komprova dezlokasaun ba estranjeiru ba finalidade servisu Estadu nian
inklui konvite husi entidade ruma husi rai-liur.
Entretantu, servidor Estadu tuir
intensaun ACUDSE nian bele agrupa ba grupo tolu – Títulares Órgão de Soberania,
titulares ba kargus espesífikus no funcionário Funsaun Públika nian.
1.1
Títulares Órgão Soberania
Bainhira refere ba klase
titular orgaun soberania nian, ho baze ba artigo 67.º Konstituisaun Repúblika Demokrátika
Timor – Leste (KRDTL), ita refere ba Prezidente Repúblika, Prezidente
Parlamentu Nasionál, Primeiru Ministru no Prezidente Tribunal Rekursu.
1.2
Titulares ba kargus espesífikus
Servidor Estadu titular
kárgu espesífiku mak sira ne’ebé tipifika claramente iha alíneas a) to j) husi
númeru 2 iha artigo 3.º husi ACUDSE. Iha artigo refere ba membro orgaun
soberania balun no balun nem membru husi orgaun soberania ruma, mak hanesan:
Ø Vise
prezidente Parlamentu Nasionál no Deputados sira. Sira ne’e categoriza nudar
membru orgaun soberania Parlamentu Nasionál nian;
Ø Ministru
Estadu no membru Governu sira seluk. Sira ne’e categoriza mos nudar membru
orgaun soberania Governu ka poder ezekutivu nian;
Ø Presidentes
husi tribunal superior sira. Sira ne’e mos nudar membru orgaun soberania
Tribunal nian;
Ø Prokurador-Jerál
Repúblika. Servidor Estadu ida ne’e la tama iha membru orgaun soberania;
Ø Chefe
do Estado-Maior-General das Forças Armadas de Timor-Leste, ka ida ne’ebé mak
ezerse kargu ida ne’e; Servidor ida ne’e mos la tama iha membru Órgaun
Soberania mas ita klasifika iha klase por atribuição tanba kargu espésifiku;
Ø Provedor
dos Direitos Humanos e Justiça (PDHJ). PDHJ nudar orgaun independente tuir
artigo 27.º KRDTL nida mos nudar servidor ida ne’e mos la tama iha membru
Órgaun Soberania mas ita klasifika iha klase por atribuição tanba kargu
espésifiku.
Ø Comandante-Geral
da Polícia Nacional de Timor-Leste. Servidor Estadu ida ne’e mos hanesan sira
seluk iha pontu anterior no iha situasaun análoga ho Chefe do
Estado-Maior-General das Forças Armadas de Timor-Leste;
Ø Juízes-Conselheiros
husi Supremo Tribunal de Justiça, ou husi Tribunal de Recurso, enkuantu
Tribunal ne’e rasik exerse nia kompeténsias rasik nudar instánsia judisiál a’as
liu iha Nasaun ida ne’e. Sira ne’e categoriza nudar membru orgaun soberania
Tribunal nian;
Ø Director-Geral
husi Serviço de Informações do Estado (SIE). Servidor ida ne’e mos la tama iha
membru Órgaun Soberania mas ita klasifika iha klase por atribuição tanba kargu
espésifiku;
Ø Membros
da Comissão Nacional de Eleições. Servidor sira ne’e mos la tama iha membru
Órgaun Soberania mas ita klasifika iha klase por atribuição tanba kargu
espésifiku. Pois, sira halo parte ba administrasaun independente ida[6].
1.3 Funsionárius Públikus
Benefisiáriu ikus ba per
diem tuir ACUDSE nia intensaun mak “funcionários públicos, agentes
administrativos e contratados equiparados”. Signifika abranje funsionáriu públiku, ajente
administrasaun públika no kontratadu sira seluk ne’ebé rekruta no finansia husi
OJE ou finansia husi parseiru dezenvolvimentu ruma maibé hala’o servisu
públiku. Portantu, inklui iha ne’e individu sira hotu ne’ebé mak hetan kontratu
husi Estadu independetemente nia rejime, finansia ou lae husi OJE no hala’o
funsaun públika nian. Inklui iha ne’e aplika ba kargu diresaun no xefia sira ka
ekiparadu.
Husi dispozisaun legal
ACUDSE nian nota katak esklui automaticamente individu hotu ne’ebé mak la-iha
vínkulu jurídiku-laboral ho Estadu.
c)
Forma kalkulasaun para atribuisaun per
diem ba kada loron
ACUDSE disponibiliza
padraun ba kalkulasaun per diem ba kada loron ka Ajudas de Custo
Diárias (ACD) ba kada grupu benefisiáriu ne’ebé ita temi ona iha parte b) husi
ita nia reflesaun ida ne’e iha artigo 2.º, númeru 1 ho nia anaku I tabela nian.
i.
Ba titulares orgaun soberania sira maka:
Ø 30%
ba kada loron bainhira akomodasaun no hahan (pensaun kompleta[7]) fornese husi entidade
organizadora;
Ø 100
% ba kada loron bainhira akomodasaun deit
mak fornese husi entidade organizadora ou bainhira alojamentu nian selu ketak
husi Governu Timor – Leste.
Ida ne’e aplika mos
bainhira Governu Timor-Leste entrega per diem 100% ba servidor
Estadu atu sira mak responsabiliza ba pagamentu relasiona ho akomodasaun no
hahan ka almentasaun inklui transporte, telefone, lavandaria no gastu sira
seluk ne’ebé mak liga ho servidor refere nia estadia iha rai-liur durate
servisu Estadu nian.
Ø 30%
ba kada loron bainhira despeza hot-hotu Governu Timor – Leste mak suporta ka
responsabiliza. Katak desde bilhete, hahan, akomodasaun inklui sira seluk ne’e
Governu Timor – Leste mak responsabiliza no servidor Estadu ne’e hein halo
dezlokasaun.
ii.
Ba titulares kárgus espesífikus sira maka:
Ø 20
% ba kada loron bainhira akomodasaun no hahan (pensaun kompleta) fornese husi
entidade organizadora;
Ø 80%
ba kada loron bainhira akomodasaun deit mak fornese husi entidade organizadora
ou bainhira alojamentu nian selu ketak husi Governu Timor – Leste;
Ø 20%
ba kada loron bainhira despeza hot-hotu Governu Timor – Leste mak suporta ka
responsabiliza. Signifika hahú husi bilhete, hahan, akomodasaun inklui sira
seluk ne’e Governu Timor – Leste mak responsabiliza no servidor Estadu ne’e
hein halo dezlokasaun.
Ø 100%
ba kada loron, tuir ami nia ponto de vista, bainhira Governu Timor-Leste
entrega per diem 100% ba servidor Estadu atu sira mak
responsabiliza ba pagamentu relasiona ho akomodasaun, hahan ka almentasaun
inklui transporte, telefone, lavandaria no gastu sira seluk ne’ebé mak liga ho
servidor refere nia estadia iha rai-liur durate servisu Estadu nian.
iii.
Ba funsionárius públiku (inklui kargus
diresaun no xefia ka ekiparadu sira)
Ø 15
% ba kada loron bainhira akomodasaun no hahan (pensaun kompleta) fornese husi
entidade organizadora. Entaun 15% husi per diem ne’e atu utiliza
hodi responde ba gastu sira ne’ebé mak laiha relasaun ho pensaun kompleta nian.
Katak 15% per diem atu utiliza ba kobre despeza pessoal durante
viajen no estadia iha rai-liur;
Ø 40%
ba kada loron bainhira akomodasaun fornese husi entidade organizadora ka
bainhira alojamentu selu ketak husi Governu Timor – Leste. Entaun 40% husi per
diem ne’e atu utiliza hodi responde ba gastu sira ne’ebé mak laiha
relasaun ho akomodasaun ka alojamentu nian.
Ø 15%
bainhira despeza hot-hotu Governu Timor – Leste mak suporta ka responsabiliza.
Signifika hahú husi bilhete, hahan, akomodasaun inklui sira seluk (pensaun
kompleta) ne’e Governu Timor – Leste mak responsabiliza no servidor Estadu ne’e
hein halo dezlokasaun.
Ø 100%
ba kada loron, tuir ami nia ponto de vista, bainhira Governu Timor-Leste
entrega per diem 100% ba servidor Estadu atu sira mak
responsabiliza ba pagamentu relasiona ho akomodasaun, hahan ka almentasaun
inklui transporte, telefone, lavandaria no gastu sira seluk ne’ebé mak liga ho
servidor refere nia estadia iha rai-liur durate servisu Estadu nian.
Persentajen
ne’ebé estabelese ona iha aneksu leten ka iha aneksu I husi artigo 2.º, númeru
1 iha ACUDSE tenki atribui ho baze ba tabela ajudas de custo ne’ebé mak pratika
ona husi Organizasaun Nasaun Unida Ka ONU ne’ebé lansa iha kada tinan iha fulan
janeiru kona-ba DSA rates of the International Civil Service Commission nudar
hatur ona iha númeru 2 husi artigo 2.º ACUDSE nian.
Portanto,
montante ne’ebé koresponde ba pursentajen varia husi nasaun ba nasaun no-mos
varia husi sidade ba sidade maski iha nasaun ida nia laran deit. Por exemplo,
dezlokasaun husi Díli ba Australia, karik ba iha Darwin, montante total per
diem 30% ba loron ida la hanesan ho iha sidade Perth ka iha sidade sira
seluk.
d)
Limite loron ba per diem ka
ajudas de custo
ACUDSE determina iha
artigo 1.º, númeru 1 hanesan tuir mai:
“Não são abrangidos pelo
presente diploma as deslocações ao estrangeiro para efeitos de acções de
formação, estudos e todas as deslocações que ultrapassem mais de 30 dias
seguidos.”
Husi disposto ida ne’e, literalmente ACUDSE
rekuza atu aplika ba dezlokasaun ba finalidade formasaun, estudo ka estudu
komparativu ruma ne’ebé mak nia durasaun ne’e liu husi loron 30. Signifika
ACUDSE determina komandu jeral ida konaba limite loron per diem
nian ne’ebé mak aplika ba benefisiáriu sira ne’ebé mak temi ona iha leten
independentemente ba persentajen per diem ne’ebé mak atribui kada
loron. Ho nune’e, ACUDSE koloka limite másimu per diem
dezlokasaun ba rai-liur mak loron 30 seguidos. Katak loron 30 ne’e konta tutuir
malu. Ba ida ne’e, konta loron servisu, sábadu no domingo, loron tolerância de
ponto no feriado nasional sira.
[1]
Kf. Preâmbulo husi Decreto-Lei n.º 9/2015, de 22 de abril kona-ba Ajudas de
custo por deslocação em serviço ao Estrangeiro.
[2]
Por exemplo, Memorando de Entendimento, Acordo de Cooperação, Tratados no seluk
tan.
[3]
Desizaun judicial iha ne’e tenki desizaun final ne’ebé mak la admite ona
recurso bazeia-ba princípio duplo grau de decisão ka desizaun transitada em
julgado.
[4]
Kada tinan sempre iha regras ezekusaun OJE apropriadu ba tinan refere ne’ebé
mak aprova husi Decreto-Lei ida no sempre prevé prinsípiu legalidade despezas
nian. Tan ne’e artigo ho redasaun bele diferente husi tinan ida ba tinan seluk
ou bele mantém parcialmente idêntica.
[5] Lei ida
ne’e hetan ona alterasaun ba dala-uluk husi Lei n.º 5/2009, de 15 de julho.
[6] Kf.
Artigo 4.º husi Lei n.º 5/2006, de 28 de dezembro kona-ba Órgãos da
Administração Eleitoral.
[7] Refere ba despezas sira ba alojamentu, alimentasaun, transporte, telefone, lavandaria no gastu sira seluk ne’ebé mak liga ho servidor refere nia estadia iha rai-liur ba servisu Estadu nian.
Sem comentários:
Enviar um comentário
Muito obrigado