Adenda eh Aditamentu

Paulo Soares Martins

(Mestre em Direito Tributário

pela Universidade do Minho, Braga - Portugal)

Saida mak Adenda eh Aditamentu?

Adendu eh adenda ne’e rasik mai husi lian Latina katak Addenda. Adenda signifika buat ne’ebé mak ita tau hamutuk tan ho buat seluk, adisiona, aumenta tan iha buat ida ne’ebé mak ita halo tiha ona uluk, purezemplu, textu ida, kontratu ida ka Memorandu Entendimentu (MoU).

Portantu, se iha kontratu ruma ne’ebé asina ona, no se falta buat balun mak hakarak akresenta tan, presiza elabora no akresenta tan deit. Adenda ne’e liafuan seluk bolu mos aditamentu, komplementu, apéndise para atu aumentan tan informasaun eh buat ruma iha bat ne’ebé mak iha ona.

Adenda ne’e termu ne’ebé mak uza liu, baibain, iha prosesu burokrátiku hanesan iha kontratu hanesan kontratu ba sosa sasan, aluga uma ruma no seluk-seluk tan. Ho nune’e adenda eh aditamentu ne’e só bele halo wainhira iha ona kontratu ruma ne’ebé parte ida eh seluk hakarak aumenta tan kláuzula ruma hodi regula situasaun eh faktu ruma ne'ebé seidauk regula iha kontratu eh MoU orijinál no parte rua hatán hotu atu asina.

Entaun, adenda iha kontextu jurídiku nian presupen buat rua:

1.     Kontratu eh MoU ne’ebé iha ona.

2.     Kontratu eh MoU ne’e tenki vigora hela ka seidauk sesa ninia vijénsia.

Entaun, adenda ne’e tenki depende eh tabele ba kontratu ruma ne'ebé vale hela. La iha adenda ba kontratu ne’ebé mate ona. Wainhira kontratu mate ona, entaun labele halo adenda, maibé só bele halo kontratu foun. 

Entaun, será que bele halo adenda para altera data kontratu ruma nian? Hatán ba ida ne'e  só bele negativa. Tanba kontratu ida sesa ho nia termu ka iha lian Tétum katak mate ona ne'e só bele iha kontratu foun eh, karik iha klázula ruma dehan katak nia renova automátikamente ho periodu hanesan, entaun, bele renova automátika. Maibé se laiha kláuzula ruma mak temi nune'e, entaun laiha tan adenda. Tanba adenda para atu aumenta eh akresenta buat ruma, se para renova data, entaun ne'e la'os ona adenda. Tanba adenda, husi nia konseitu rasik dehan momoos katak akresenta buat ruma, adita buat ruma. Se troka data, ne'e laós akresenta maibé renova. Tan ne'e mak adenda ne'e tabele ba kontratu orijinál katak adenda ne'e tenki la'o tuir kontratu ne'ebé mak moris no nia sei mate ho kontratu eh MoU ne'e rasik.

Referénsia :

·       http://www.significados.com.br/adendo/, asesu iha loron 11 fulan Janeiru, 2016.

·       http://www.priberam.pt/dlpo/adenda , asesu iha loron 11 fulan Janeiru, 2016. 

Distinsaun entre konseitu Inaugurasaun ho ‘Hatama-Ahi’ iha kontextu kultural Uma lisan nian: Pontu de vista prátiku

Distinsaun entre konseitu Inaugurasaun ho ‘Hatama-Ahi’ iha kontextu kultural Uma lisan nian: Pontu de vista prátiku

Iha kontextu kultural prátika tradisionál timor-ninian, liuliu, iha kuadru harii uma lisan eh uma lulik nu’udar knua ba ema timor oan no, liu-liu, iha zona suku Manutasi, postu administrativu Ainaro, munisípiu Ainaro ninian, konseitu inaugurasaun no Hatama-Ahi hola forma rua diferente maibé kuaze, parsialmente, aplika ba realidade kltural idéntika ida mak Inaugurasaun.

Iha vida prátika, konseitu inaugurasaun aplika ba konstrusaun foun, maibé dala ruma mós aplika ba reabilitasaun ba konstrusaun físika ruma. Iha kontextu kultural prátika tradisionál harii uma lulik iha zona supra, ita hetan konseitu rua. Ida primeiru mak konseitu Inaugurasaun ne’ebé, vulgarmente, eme hotu hatene no ida Segundu mak konseitu ‘Hatama-Ahi’. Kona-ba konseitu inaugurasaun, ema hotu hatene no ita hotu hatene ninia existénsia no ninia importánsia. Iha experiésia komum ema nia moris, konseitu ida ne’e eh realidade ida ne’e mosu wainhira iha konstrusaun foun no bele mós iha reabilitasaun eh rekonstrusaun físika ida. Rekonstrusaun físika iha ne’e koalia liu-liu ba iha kuadru rekursus infraestruturas sira.

Ko’alia kona-ba konseitu ‘Hatama-Ahi’, dala ruma, estrañu ba ema sira ne’ebé nunka rona espresaun ida ne’e. Realidade ida ne’e mosu iha sekuénsia reabilitasaun eh rekonstrusaun parsiál ba infraestrutura ida. Maibé infraestrutura iha ne’e limita liu ba iha konstrusaun parsiál uma lulik ida iha zona supra. Konstrusaun parsiál katak wainhira uma lulik ida ne’ebé harii kleur ona maibé ninia dut uma ninian, buat ne’ebé ema bolu atap iha lian Indonézia nian eh tecto iha lian Lusa nian ne’e at ona, lá fo ona kondisaun atu ema ne’ebé hein knua ne’e hela iha laran no uma ninia oan mane sira halo atividade seluk iha uma ne’e ninia laran. Purezemplu, kakuluk kuak ona no udan sai tun ba uma laran. Iha kondisaun ne’e mak oan mane husi uma lulik ne’e reuni hamutuk para foti desizaun koletiva ida atu oinsa mak bele halo reabilitasaun ba uma lulik ne’e. Atu troka dut ho tali-metan (tua tais) deit eh troka mós ai sira balun ne’ebé kompoen eskeletu uma ne’e ninian. Iha kondisaun ida ne’e ita hanarán rehabilitasaun no laós konstrusaun foun. Tanba uma lulik ne’e la sobu remata eh sobu hotu maibé sobu balun deit (normalmente la inklui airin prinsipál sira mak hanesan airin bot 8 ne’ebé sai hanesan aliserse diak ida ba eskeletu uma ne’e ninian). Prosesu konstrusaun parsiál eh reabilitasaun ida ne’e lao hanesan mós konstrusaun uma lisan baibain, katak observa nafatin lala’ok tradisionál eh prosedimentu no prosesu baibain ne’ebé aplika iha konstrusaun uma lulik ninian.

Wainhira reabilitasaun eh konstrusaun parsiál ida ne’e hotu ka prontu ona mak sei tuir kedas ho etapa ida ikus nian mak ‘Hatama-ahi’.

Hatama ahi ne’e, hanesan refere ona iha leten, kuaze atu asumi forma de inaugurasaun ne’ebé simboliza ho sunu ahi iha Hidal (ahi-matan ne’ebé eziste iha uma lulik nia laran). Antes ne’e tenki oho uluk animál ruma ba ninia ritual, purezemplu, fahi ida (la interesse inan eh aman). Oho iha kedas uma lulik laran, iha zona hidal ne’e ninian. Hafoin ninia ran kahur hamutuk ho nú nurak ninia ben hamutuk ho tohu ninia bem. Mistura husi buat sira ne’e ikus tenki hisik haleu uma laran no uma liur (hisik tipu hisik aguaventa). Hafoin suni ahi iha ahi matan ne’e. Sunu ahi ne’e utiliza ai baibain sen formalidade tradisionál ida. No ahi ne’e tenki foti husi ahi foun, ahi foun ne’e bele mós ahi ne’ebé halo manuál ne’ebé mai husi rekursus naturais (koa Au, ahi-ta, nsst), preferívelmente, no bele foti husi eskeiru, gas eh ahi-kose baibain, esepsionálmente iha kazu ne’ebé rekursus naturais utilizadu la providensia ahi.

Tanba sá mak halo ida ne’e? Tanba uma ne’ebé halo reabilitasaun eh konstrusaun parsiál ne’e konsidera nu’udar fatin matak eh sei okupa hela husi espíritu balun ne’ebe la diak. Tanba ne’e hatama ahi no hisik mistura husi material líkidu sira ne’ebé temi iha leten ne’e para atu duni sai espíritu la diak (malignu) sira hodi nune’e bele fo fatin ba espíritu diak, liu-liu uma ne’e ninia nain. No, konsekuensialmente, sira diak no uma nain ne’e mak sei guarda ita uma oan husi espíritu maignu sira ninia tentasaun. Tanba tuir krensa iha kontestu uma lulik ninian, iha espíritu poderosu ida (laós super poderosu, tanba super poderosu ne’e mak Maromak deit, úniku) ne’ebé diak ne’ebé mak Maromak haruka atu hein uma lulik ne’e mak ita hanaran ‘Uma-Nain. Pois, ideia ida ne’e hetan ninia projesaun mai husi fiar ida ne’ebé mak dehan katak estrutura ukun selestiál ne’e diak liu, poderozu no estruturadamente, atu hanesan ho estrutura Estadu modernu. Katak ukun bot hotu-hotu ninia ukun mak NAI MAROMAK deit, maibé NIA ida ne’e iha ninia Manu-ain iha fatin hotu-hotu, nia Manu-ain sira ne’e mak sira ne’ebé fiél ba NIA no hala’o servisu NINIAN. Entaun, NIA konfia manu-ain sira ne’e no sira ne’e mak iha forsa ka kbiit atu hatoo relatu ba NIA. Tan ne’e, ho serimónia hatama ahi ne’e, lia-nain be hein uma lulik ne’e sei halo orasaun tradisionál espontánea hodi husu matak malirin, aliás bensa husi Maromak ba uma lulik ne’e nia jerasaun toma (feton, nan, oan, bei-oan no jerasaun tomak uma ne’e ninian). Iha orasaun husi sempre hahú ho liafuan ida ne’e “ Ó Au Uma au Api, Au-Ina, Au-Ama ....”. Fraze primeiru refere ba Uma lulik no ninia nain, fraze segundu refere liu ba Maromak (Super poderosu). Tanba sa, liu husi Uma-lulik pois sa’e liu ba Maromak ne’ebé asumi papel nu’udar Inan-Aman ba ita ema.

Ikus liu, konseitu rua ne’ebé temi iha leten ne’e atu hanesan maibé iha realidade kulturál, liu-liu kontestu uma lisan ninian, aplika iha realidade rua ne’ebé la hanesan.          

Husi:

Paulo Martins - Uma Lisan Diurpu nia oan-mane.